Год ад года Пагарскага бульбяная фабрыка павялічвае вытворчы патэнцыял, і калі ўчора даччыныя прадпрыемствы, якія займаюцца земляробствам, стаўку рабілі на вытворчасць бульбы, то сёння на палях аграхолдынга апрацоўваюць не толькі «другі хлеб».
Важкі клін займаюць азімыя (300 га), яравыя збожжавыя пасеяны на 100 гектарах. Вялікую ўвагу надаюць хлебаробы апрацоўцы рапсу, гэтая культура сягоння асабліва запатрабавана на айчынным аграрным рынку.
У гэтыя дні на палях фабрыкі завяршаюць работы па пасадцы бульбы. Гэтая культура была і застаецца галоўнай, бо якасныя клубні патрэбныя не толькі для перапрацоўкі, фабрыка актыўна рэалізуе харчовую бульбу цэлы год, а сухія бульбяныя шматкі закупляюць краіны блізкага і далёкага замежжа.
Прадукцыя Пагарскай бульбяной фабрыкі пастаўляецца ў дваццаць краін замежжа, уключаючы Еўропу, ЗША, Лацінскую Амерыку. Такія вынікі дасягнуты дзякуючы энтузіязму дырэктара прадпрыемства, доктара эканамічных навук Івана Дуданова.