Урад Таджыкістана забараніў продаж цыбулі за мяжу, паведамляе партал Sputnik Таджыкістан.
Падчас прэс-канферэнцыі начальнік Рэгіянальнага мытнага ўпраўлення па Сагдыйскай вобласці Зафар Махмадзіеў растлумачыў прычыну такіх дзеянняў улад.
«Забеспячэнне рынкаў краіны ўсімі відамі тавараў і прадуктаў аналізуецца ўрадам краіны. У апошні час цана на цыбулю вырасла ў 2-3 разы ў параўнанні з папярэднімі гадамі. У мэтах забеспячэння ўнутраных рынкаў і рэгулявання цэн на прадукцыю экспарт цыбулі цяпер забаронены», - сказаў Махмадзіеў.
Па словах начальніка Сагдыйскага мытнага ўпраўлення, вываз цыбулі за мяжу прыпынены прыкладна на два тыдні.
Паводле інфармацыі мытных органаў, за 6 месяцаў бягучага года з Сагдыйскай вобласці вывезена 66 тыс. тон цыбулі, што на 10 тыс. тон менш, чым годам раней.
Між тым сёлета цана на цыбулю вырасла з 1-1,5 самані да 5-6 самані (1 самані = 5,87 расійскіх рублёў).
Рост цаны гэтага віду прадукцыі чыноўнікі аграрнага ведамства звязваюць са скарачэннем пасяўных плошчаў, дрэнным надвор'ем і падаражэннем мінеральных угнаенняў.
У гэтым годзе фермеры Сагдыйскай вобласці пасадзілі цыбулю на 3443 га, што на 846 га менш, чым у мінулым годзе.